مرسي علم طبيعة بحرية مش موجوة في اي مكان تاني في مصر و موجودبها شواطئ و مناطق مصنفة عالميا , تعتبر المكان المثالي لاي حد بيحب البحر سواء سنوركلينج او غطس بعيدا عن الـ Night life تماما .. هناك غالبا بتبدأ يومك الساعة 6 الصبح وتنهيه ع المغرب.
مرسى علم من القاهرة حوالي 750 كم و بعد الغردقة ب 300 كم , الطريق بياخد في حدود 10 ساعات بالاتوبيس وفي اكثر من رست في الطريق و ممكن طيران لمطار مرسى علم في ساعة و نص بس اسعار الطيران مبالغ فيها جدا لهناك.
و المختلف في مرسى علم ان المسافات بين الاماكن هناك كبيرة يعني لو اقامتك في المدينة نفسها هتحتاج عربية اكيد معاك لانك ممكن تبقى عايز تتحرك لاماكن بتبعد عنك في حدود ال 70 و 80 كم سواء جنوب او شمال بس اكترها متركز في حدود المحمية جنوب مرسى علم .
اماكن الاقامة في مرسي علم
سواء منتجعات او كامبات بتبدأ من بعد القصير شمال مرسى علم بحوالي 100 كم لحد محمية وادي الجمال جنوب مرسى علم بـ 70 كم , عشان كدة اختيار مكان الاقامة بيفرق كتير جدا على حسب انت هتتحرك لفين او هتزور ايه والانتقالات هناك تكلفتها ممكن تكون اكتر من نصف تكلفة الرحلة كاملة و الاقامة طبعا بتختلف مابين فنادق 5 و 4 نجوم و كامبات و لودج.
اهم الرحلات الداخلية و الخروجات فى مرسي علم مينفعش تفوت زيارتها
منطقة شعاب سطايح ( دولفين ريف) :
دي بتطلع يوم كامل باليخت من الساعة 7 الصبح من مارينا حماطة جنوب مرسى علم بـحوالي 100 كم و اليخت بيتحرك جنوبا لمسافة 35 كم تقريبا في حدود ساعتين للوصول لـ سطايح , و دي اكتر رحلات البحر المميزة هناك لانك بتنزل سنوركلينج مع الدولفين و على شعاب سطايح و المياه الكريستالية هناك.
شاطئ راس حنكوراب او شرم اللولي :
جنوب مرسى علم بـ 60 كم داخل نطاق محمية وادي الجمال و ده مصنف عالميا من افضل 10 شواطئ بلون المياه الفيروزية و طبيعة الشعاب و الحياة البحرية فيه و ليه رسوم دخول تابع للمحمية بـ 5 جنيه بس !
خليج القلعان بمحمية وادي الجمال :
جنوب مرسى علم بـ 80 كم و ده فيه اكبر تجمع لاشجار المانجروف في مصر و اللي يتنمو بطول الساحل على المياه المالحة و بتشوف هناك لوحة فنية كاملة مابين درجات الازرق و الرمال البيضا و اشجار المانجروف الخضرا و يعتبر من احسن الاماكن اللي ممكن تحضر منها الغروب و هناك فيه كامب و مطعم و خيمة على البحر تقدر هناك تشرب او تاكل فيها تابعة لقبائل العبابدة اهل المنطقة هناك !
شاطئ ابو دباب ( بيت السلاحف البحرية )
و ده شمال مرسى علم بحدود 35 كم و هو شاطئ رملي مجهز تابع لاكتر من فندق هناك و ليه رسوم دخول في حدود 120 جنيه و هناك بتنزل سنوركلينج من على الشاطئ مع السلاحف و ممكن تاخد رحلة بالمراكب المطاطية الصغيرة لمدة ساعة او 2 و تنزل مع الـ Sea Cow او Dogongo الموجود هناك و يعتبر من اندر الكائنات البحرية في العالم.
و طبعا في شواطئ تانية و اماكن سنوركلينج و غطس كتير بطول الساحل كامل و رحلات بحر تانية كتير غير سطايح بس دول يعتبروا اهم اماكن هتشوف فيهم طبيعة مختلفة و كائنات و حياة بحرية غير اي مكان تاني في مصر.
